Rådgjevar eHelse IKT Nordfjord

Vil du bidra til framtidas helsetenester i IKTNordfjord? Er du motivert for å leie an i digitaliseringa av kommunale helse- og omsorgstenester?
Då kan du vere den vi leiter etter!

Bakgrunn for utlysinga
Den demografiske utviklinga med aukande tal eldre og komplekse omsorgsbehov krev at vi leverer tenester på nye, effektive måtar. Kommunane i IKT Nordfjord har eit felles mål om å samordne og koordinere digitaliseringsarbeidet innan eHelse.
Denne sentrale rolla skal sikre at vi nyttar smarte helseteknologiløysingar for å auke kvalitet, effektivitet og pasienttryggleik i heile regionen.

Omgrepet eHelse er eit samleomgrep som femnar bruk av informasjons- og kommunikasjonsteknologi (IKT) og ulike digitale løysingar i helse- og omsorgssektoren for å betre kvalitet, sikkerheit og effektivitet i helsetenestene.

IKT Nordfjord er eit kommunalt oppgåvefellesskap mellom kommunane Bremanger, Gloppen, Kinn, Stad og Stryn.
Samarbeidet har to vertskommuneeiningar; ei strategieining (IKT strategi) og ei driftseining (Nordfjordnett), under leiing av eit representantskap, eit styre og dagleg leiar.
Stad kommune er kontorkommune for dagleg leiar, assisterande dagleg leiar i Strategisk eining og vil vere eHelse-rådgjevaren sin arbeidsgjevar.
Kinn kommune er kontorkommune for driftseininga Nordfjordnett som ligg i Måløy.

Stad kommune er arbeidsgjevar og kontorstaden er på Nordfjordeid, men det er høve til noko fleksibel arbeidsløysing. Du må rekne med noko reiseverksemd mellom samarbeidskommunane.

Strategi og utvikling:

• støtte og rådgje kommunane i utviklinga av felles eHelsestrategi, med fokus på helsefagleg forståing, pasienttryggleik og effektive arbeidsprosessar
• ha eit høgt fokus på pasienttryggleik, personvern og utvikling av effektive arbeidsprosessar
• følgje med på nasjonale strategiar, standardar og føringar innan e-helse, og sikre at kommunane si utvikling er i tråd med nasjonale krav og initiativ
  

Koordinering og prosjektleiing:

• støtte og koordinere fellesprosjekt for implementering av nye fagløysingar, digitale verktøy og helseteknologiske løysingar
• støtte og bidra til god gevinstplanlegging og gevinstrealisering i samband med innføring og bruk av nye digitale løysingar

System- og avtaleforvalting:

• sikre samordning i anskaffing, innkjøp og avtaleforvaltning av eHelseløysingar på vegner av kommunane, og vere dialogpartner med leverandørane

Informasjonssikkerheit og personvern:

• i samarbeid med driftssenteret, bidra til å effektivisere arbeidet med risiko- og sårbarheitsanalysar (ROS-analysar) og redusere risikoen for uønskte hendingar ved å samordne systembruken.

Støtte og kompetanseheving:

• hjelpe kommunane med kompetanseheving og støtte i innføring, dagleg bruk og forvalting av digitale og helseteknologi løysingar.

Vi ser etter deg som har solid helsefagleg bakgrunn kombinert med interesse og kompetanse innan digitalisering, eHelse og helseteknologi.

• Du har relevant utdanning innan helsefag, IKT, digitalisering, prosjektarbeid, eller tilsvarande relevant erfaring
• Du har erfaring med prosjektarbeid og implementering av IKT-løysingar/fagløysingar, fortrinnsvis frå kommunal sektor
• Du har god forståing for personvern (GDPR) og informasjonstryggleik i helsesektoren
• Du har gode kunnskapar om, og held deg oppdatert på, nasjonale føringar, dagens og framtidas teknologi og helseteknologiske løysingar
• Du må ha førarkort minimum klasse B
• Du må ha god norskkunnskap, både munnleg og skrifteleg
  

• Du er ein lagspelar som trivst i prosjekt og anna samarbeid
• Du har evne til å arbeide strategisk, systematisk og sjølvstendig
• Du har sterke kommunikasjons- og samarbeidsevner, og evne til å fungere som eit bindeledd mellom ulike fagmiljø

• Du får vere med og utvikle ei spennande og viktig rolle i skjeringspunktet mellom helse og teknologi
• Moglegheit til å påverke og forme framtidas helsetenester i Nordfjord
• Eit godt fagmiljø og samarbeid med engasjerte kollegaer i fleire kommunar og IKT Nordfjord og med våre samarbeidspartar
• Konkurransedyktige vilkår og gode pensjonsordningar
• Busette i Stad kommune kan søkje Lånekassen om å få sletta delar av studielånet sitt
  

Om arbeidsgiveren:

Stad kommune har om lag 9 600 innbyggjarar og ligg midt i Nordfjord heilt nord i Vestland fylke. Kommunen består av fleire livskraftige tettstader og strekkjer seg frå storhavet i vest til fjell- og fjordlandskap i aust. Her finn du Vestkapp, surfemiljø i Hoddevika, Selja kloster, Harpefossen skisenter, vikingsenteret Sagastad, Malakoff-festivalen, Opera Nordfjord og Europas djupaste innsjø, Hornindalsvatnet. Kommunen har ledige bustadtomter, gode kommunale tenester, eit variert næringsliv og innbyggjarar med initiativ og pågangsmot. Stad kommune har som overordna mål å bli fleire. Vi treng deg som ønskjer å flytte til kommunen vår, og vi treng deg som har budd ute ei stund og ønskjer å flytte heim. Vi ønskjer å utvikle eit livskraftig og trygt samfunn der vi alle dreg i lag. I Stad kommune vil du møte lokalsamfunn som skil seg ut. Kommunen er stor nok til å gje deg rom og la deg leve ut draumane dine, og liten nok til å sjå deg og ta vare på deg. Vi ønskjer deg med på laget!

www.nordfjord.no/stad

www.hjartestad.no